"إيطاليكست" أو أحتمالية خروج إيطاليا من الاتحاد الأوروبي

   بقلم : أشرف إبراهيم

إيطاليا فيها أزمة سياسية ربما تفجر مشاكلها الاقتصادية والمالية العميقة المتراكمة منذ الأزمة العالمية 2008، والركود الكبير في 2012.

الشعبويين فشلوا في تشكل حكومة، وفيه انتخابات تانية هتتعمل.. فيه حالة من الفزع عند المستثمرين الدوليين من أن الانتخابات ده تجيب حد من وسط الشعبويين اللي بينادوا بالخروج من الاتحاد الأوروبي وبالتالي التخلص من اليورو.. علشان كده اليورو انخفض بنسبة 1% أمام الدولار أنهاردة.

إيطاليا عندها مشاكل اقتصادية ومالية كبيرة أبرزها الديون.. والمشكلة أنها ديون غير مرغوب في الاستثمار فيها بسبب ارتفاع المخاطر حوليها.. مؤشر البورصة الإيطالي بقاله كام يوم بيواصل نزيف الخسائر، وفيه بنوك انخفضت أسهمها بنسبة 5%.

إيطاليا عندها تالت أكبر اقتصاد في منطقة اليورو، وناتجها المحلي بيمثل 15% من إجمالي الناتج المحلي بتاع الاتحاد الأوروبي.

بسبب سنوات من الركود وتغاضي الحكومة عن القيام بإصلاحات حقيقية وصلت الديون الحكومية الإيطالية إلى 2.3 تريليون دولار، ما يعادل 130% من ناتجها المحلي. وتعتبر تالت أعلى مستوى مديونية في العالم بعد اليابان واليونان.

مشكلة الشعبويين مش مجرد التهديد بالخروج من الاتحاد الأوروبي، وإنما سياستهم الاقتصادية القائمة على الإنفاق، بهدف رفع مستويات المعيشة، بغض النظر عن الإنفاق ده هيهبب إيه.. فتح حنفية الإنفاق يعني مزيد من ضعف الوضع المالي يعني توقف جهود إصلاح الاقتصاد.

الوضع في إيطاليا مختلف تمامًا عن بريطانيا .. وتأثير الخروج من الاتحاد الأوروبي هيهدد وجود الاتحاد أصلًا .. بريطانيا كان عندها عملتها الخاصة وبالتالي الاشتباك المالي كان قليل.. بريطانيا مكنش عندها حجم الديون الضخم ده..

معضلة إيطاليا أنها جمعت جميع المشاكل اللي موجودة في كل دولة أوروبية على حدى.. يعني عندها مشكلة الإنتاجية اللي في بريطانيا... عندها مشكلة البطالة اللي في فرنسا.. عندها مشاكل مصرفية اللي موجودة في إسبانيا.. عندها مشكلة الهجرة اللي موجودة في ألمانيا.

علشان كده الاقتصاديين شايفين إيطاليا أنها ربما تكون زي rabbits in the headlights أو الأرانب اللي بيتم اصطيادها في المصابيح الأمامية .. وده مصطلح بيتم استخدامه لوصف شخص متوتر لدرجة أنه مش قادر يتحرك أو يتكلم.. زي الأرانب اللي بتلاقي نفسها في وسط ضوء مصابيح السيارة، وحركتها بتتشل لأنها مبتكنش عارفة تتصرف أزاي في اللحظة ده.

المهم متنسوش تتابعوا الحلقة الجاية من المخبر الاقتصادي يوم الجمعة بإذن الله هتكون عن الاستثمار وأفضل الطرق للحفاظ على مدخراتك وسط موجات التضخم اللي موجودة حاليًا.

رابط قناة اليوتيوب: https://goo.gl/NMiQaV

رابط صفحة الفيس: https://goo.gl/KwtWfR

#إيطاليكست

#المخبر_الاقتصادي

#Mokhbir_Eqtisadi