منظومة الفساد وشلة المنتفعين

الناس اللى شافت فساد فى منظومة كرة القدم فقط وبتحاول تدفن رأسها فى الرمال وتغض النظر عن باقى منظومة الفساد المتفشى فى كل المؤسسات وبتطالب بالتحقيق مع اتحاد الكرة ومحاكمتهم .

احب اقولكم ان شلة الفنانين اللى هاجمتوهم ورميتوا عليهم الحمل كله بانهم السبب .

هما كمان عندهم فساد كبير فى قطاعهم وللاسف زى مافى ناس كتير منهم بيدافعوا وباستماته عن نفسهم ورافضين تدخل اى حد من خارج الوسط انه يكشف الفساد ده وكانهم دولة داخل الدولة . 

ولما كم واحد من وسطهم حب يكشف الفساد ده وقدم بلاغات للنائب العام والرقابة الادارية والجهاز المركزى للمحاسبات للاسف تم اقصائهم من اعمال كتير من ضمنها اعمال رمضان على اقل تقدير .

وفى منهم ناس مشتغلتش لمدة اكتر من سنة وهما ملازمين الكمبيوتر وبيتفرجوا على مجاملات الشلة وبعضهم فى اكتر من عمل فنى وللاسف برضه ان المهيمن على الاعمال دى حاجة كده اسمها اعضاء المجلس حاجة كده زى شلة منتفعين اتحاد الكرة وبيتناوبوا على الاعمال الفنية مع بعض ولا عزاء لمن شارك فى اسقاط دولتهم السابقة (دولة مبارك) وطبعا ملهمش مكان وسط الدولة الجديدة اللى كلها محسوبية ومجالس بدون رقيب واقصاء كل من شارك فى ثورة يناير او من يحاول كشف الفساد .

المجلس ده سبق واتقدم فيه اكتر من شكوى ومرت مرور الكرام واتحفظت فيه تحقيقات برغم تورط اعضاؤه فى قضايا فساد اشبه بما  نتهم به اعضاء الجبلاية الان وهى ايضا اموال دولة على فكرة وفى امور اخرى مثل مشكلة التشغيل وقضايا الاستيلاء على اراضى دولة والاستعانة بشركات مقاولات بالامر المباشر مما يفتح المجال للشكوك حول شبهة رشاوى وغيرها من الامور التى لم يتم البت فيها والتلاعب فى مشروع اسكان يخص الفنانين .

الحقيقة انا قصدت ان الفت نظركم للتشابه الكبير فى قطاع الفن واعمل مقارنة بسطية بين مجالين هم اهم مجالين فى الساحة الان بحكم الشو الاعلامى المعمول بيه فى دولتنا اللى بتهتم بهؤلاء الاشخاص .

كمان لكل عضو فى المجلس ده شلته اللى بتدافع وبتهاجم كل من يحاول كشف الفساد ده وبعضهم بيتراضى بمشهد او اتنين فى بعض الاعمال الفنية لانهم شلة واحدة وفى خندق واحد .

كمان  مؤخرا تم طرح اسماء منهم للمنافسة على عضوية مجلس النقابة ومنهم اللى معرفش يحصد اصوات لكنه بيمارس دوره المطلوب منه عادى جدا وبيحضر مكان بعض زملاؤه فى برامج توك شو وبيرد غيبة شلته على الهواء .

لو فعلا فى بلدنا حسينا بمحاولات تصحيح الاوضاع ياريت نشوف تحقيقات عادلة فى المواضيع اللى زى دى واتمنى الحقائق تظهر للملايين عشان كل واحد يعرف حجمه ونكشف مدعى الوطنية والحرامية امام الرأى العام .

كمان فى بعض المحسوبين على الصحافة والاعلام ممن درسوا فى اكاديمية الفنون ومنهم من يعمل فى مجال الفن ايضا ويجامل ويكذب البعض  وايضا يجمل صورة الشلة باستمرار فى الصحف الخاصة مقابل حصوله على ادوار ثانوية او بيرد الجميل لكبيرهم اللى كان سبب فى عمله فى هذه المؤسسة الاعلامية وايضا حتى يكون احد اذرعه الاعلامية وقت ما يحتاجه مولانا كبيرهم واللى قدر  يكون بنفسه  شبكة علاقاته منذ ايام خدمته لمبارك و اللى بتسمحله ان يأمر بظهور من يرضى عنهم فى البرامج والمحافل او يمنع ظهور من يغضب عليهم سعادته بمكالمة هاتفية او بتهديده بمقاضاة القناة التى تذيع حقائق يعلمها هو وافراد شلته ويعلمون مدى خطورتها لكن رأيت الكثير امام عينى من تخاذل اعلاميين كبار ولهم ساعات طويلة على الهواء يعبثون بعقول المشاهدين فى قضايا فرعية لكنهم رفضوا ظهور من تقدم ببلاغات رسمية ويتم التحقيق فيها مجاملة لصديقهم الودود المهيمن على الجميع   .

المقصود ايضا من الطرح ده وبالشكل ده انه لا حياة لمن تنادى و الشللية لا يمكن محاسبة الجميع دفعة واحدة لانهم مربطين مع بعض وكل واحد عنده ما يملكه على الاخر .

واكبر دليل رضوخ الجهاز الفنى لحارس مرماه اللى هدد بانه لو ملعبش مبارة  هيضطر انه يفتش اسرار كتير هو يراها بعينه وبلغة لوى الدراع فيها لا خفيها .

واكبر دليل ايضا ان لحد النهاردة محدش سمع عن حساب مسؤل وكل فترة بيخرج علينا خبر صغير بسقوط محافظ برشوة او رئيس حى متلبس لكن مافيش حد من الكبار اللى بجد مثلا سمعنا انه خد ساعة حبس بتهمة افساد الذوق العام برغم السباب والشتايم اللى بنشوفها وعارفينها وكل يوم على قنوات فضائية وتم منع ظهور اعلاميين ومشهورين فقط باللسان لكن لم يتم تنفيذ هذه القرارات واتضح انها كانت قرارات بتمتص غضب الناس اللى اصبح ملهوش لازمة يغضبوا او لا طالما الدولة بتتعامل معانا بمنطق الفتونة وهو ده اللى هنعمله فيكم وعلى المتضرر اللجوء الى الانتحار او يخرج منها او نسلط عليه شراشيح فى شكل اعلاميين وبدون احترام شرف المهنة او معايير الاعلام المهنى .

الكلام كان كتير لكن فيه اكتر .

المساواة فى التحقيقات والمطالبات ولابد من محاسبة الجميع حتى مسؤلوا الدعاية والشركة الحكومية الراعية وده اقل متطلبات مرحلة التطهير ده لو عندنا نية اننا نطهر وده مش ملموس للاسف .